واحد حجازي يقول لعـيالوه قصة الزيرسالم : لاتفوتكم

[باسم علي]

واحد حجازي يقول لعـيالوه قصة الزيرسالم : لاتفوتكم
هذه قصة حلوة جدا اعجبتني وحبيت انقلها لكم.

واحد حجازي يحكّي اولاده قصة الزيرسالم ) اقروا القصة واضحكوا(


يااولادي دحين بقلّكم لمن ألتقى الواد جساس بالحونشي داك الي شايف نفسو مرة الي اسمو كليب..


خدو الرواية:


كليب كان ماشي في برحة مرة كبيرة ومافي ناس ولا في احد جنبو .


والواد جساس بصراحة خلبوص شويه وجبان ..لأنو استغل وجود الحونشي كليب لوحدو..


المهم عمنا كليب ماشي بامان الله وقاعد يشم شوية هوا وبعيد عن رجةالبزورة والبيت ومشاكل عيال عمو وقلق الناس الي عندو...


المهم جا الواد جساس وقلّو: انت يا كليب


طبعا كليب ادالو اشكل مارد عليه ولا ادالو وجه


قال جساس: انت يا كليب رد اشبك انا قاعد اهرجك ياهووه


وداك مديه اشكل وربي ولا هو معبرو


جساس: شوف ياكليب..انتا كسرة الماصورة حقتنا ولا خليتنا نشرب مويه

لا نحنا ولا غنماتنا ولاجملاتنا ... وكل هادا ونحنا ساكتين

وقلنا عيب مو مشكلة دا برضو ولد عمنا ومن لحمنا ودمنا... وكبير العيلة

لكن انك تفرد عدلاتك( عضلاتك )علي الجمل حقت خالتي (البسبوسة)وتقتلها كمان؟

لا حبيبي دا مو كلام رجاجيل وألّي انتا سويتو غلط في غلط

مو عشان سكتنالك تحسبنا خايفين منك..نحنا احترمنا صلة القرابةالي بيننا

وقلنا هذا( بو رحم )ومننا و فينا بس انتا بالمرة خبصت أم الشغلة.


ومع كل دا الكلام والحونشي عمنا كليب مديلو اشكل بقوة ، ولا كأنو في احد بالمرة.


جساس صرخة بصوت عالي مرةانت يا كلـــــــــــــــيب ياخي رد عليّا ايشبك ،اتبكمت والا ايش؟


انا عارف انو ما تطالع وراك الا ازا كان فيه بشكة اقل شي اربعين راجل...


كليب طبعا رد وهو لاوي بوزو ، ويعني اٍنو قوي مرة.. وقال:لا يا بويا غلطان ،أنا ما ارد إلا لمن تكون البشكة 50 راجل.


ساعتها الواد جساس جسمو تكهرب شويه بس سوى فيها انو ولا همو


وداك عمنا طنش وكمّل مشيو مع الحصان حقو المهم الواد جساس طرطع وقفلت معاه وركبو 100 عفريت..


وفي لحظة غضب الواد جساس طلّع الرمح حقو..ورماه علي عمنا كليب وغرزو في ظهرو ..


قام يتألم ويتبكبك الحونشي كليب وقعد يصرخ بصوت عالي كأنو بعبع(وحش ) ...


الواد جساس قال: ياواد ما يبغالهاالا افركلهاواشرد لا يجي احد دحين والا يجي الزير ويسويلنا قلق محنا فاضيلو دحينا، وهاتك يا فكيك دق سلف بالحصان حقو ونمر لها..


اما عمنا كليب حالتو صارت حاله ، قام يزحف علي بطنو شوية لمن وقف علي رجولو ويمشي والرمح معلق بظهرو ، لمن التقى بواحد بدوي حق غنمات ... لمن شافو البدوي انفجع


وقلّو: مو انتا عمّنا كليب ،اشبك كدا؟ ... ايش صار فيك ياعمنا ..


رد عمنا كليب على البدوي وقلّو: روقنا ياخي ، مو وقتو ، ما تشوفني مغرق بالدم وانتا لسه تسال؟


.ياخي جيب لي شوية مويه ابغى اشرب ياواد...


البدوي صاحبنا جبلو مويه وشرّبو .


كليب: اسمع ياواد انا غدر بي الواد جساس واكلني الرمح حقو بظهري من ورى ...


والي خلق امك لو انو كان من قدامي كان عرفت اتصرف معاه ...


لكن هو رمه وجبان وخيخة وجايني من ورى لكن مو مشكلة انا اعرف اجيب حقي...


حتي وانا ميت ورايا رجاجيل ما تترك حقي يابويا.


وقال كليب للبدوي: حكتب لك وصية تخليها حلقه بودنك وحكتبها علي الجدار دا بدمي


( لانو ماكان معاه قلم ولاورقةولا حاجة يمكن نسيها في البيت )...


ولازم اخوي سالم الداشر يقراها...

وبعدين الله يخليك تسوي معايا معروف انك تقتلني بعد ما اغلق من القصيدة ...

قبل ما يعفن ظهري وتصيبني الغرغرينة ( سلام وقول من رب رحيم(


قلّو البدوي طيب.

وبدا ابو الشباب يكتب الوصية:


وهي كالاتي:


اول بيت يقول: استغفر الله اله العرش لا يعبد سواه ...


وتاني بيت يقول: الملك لله رفع السماء وبسط الارض ...


وتالت بيت يقول: لاتنسى اليتاما وتخون العهد يادب ...


ورابع بيت يقول الله اكبر علي الظالم المفتري الغدار اصحك تسيبو او تسامحو


وخامس بيت يقول: جساس خمني وغدربي وطالع على الجرح بظهري وتعرف ...


وسادس بيت يقول: الزير اخويا اعرفو قوي وشديد يمرمط العدوين ويشلفطهم شلفطه...


وسابع بيت يقول: يا سلومي يا ابو السلالم خليك راجل وبطلك حركات البزورة


والبيت الثامين يقول فيه: شوف ياسالم لا تخلي ولا احد منهم لاراجل ولا شيخ ولا عجوزة ولا حريم


واقتلهم كل واحد ومرتو حتى البزورة لاتسيبهم المهم فقّع ابوهم كلهم.


وتاسع بيت يقول فيه: لا تصالح اي واحد منهم وربي لو تصالح احد حأشتكيك لربي


وعاشر بيت يقول فيه: لو ما سمعت كلامي دا ولا سويت الي وصيتك عليه نتقابل عند قاضي القضاة رب السموات والارض.


المهم بعد الهرجة هذي صاحبنا البدوي راعي الغنمات كمل علي عمنا كليب حسب طلبو


المهم الهرجة دحين وصلت لحارة كليب واهلوا عرفوا بالهرجة كلها وطبعا


اخوانوا سووا فيها كيف وما كيف ومن الكلام دا...

ونحن نفعل ونحنا نسوي وحقنا مايروح لو علي شواربنا ومن الخراط هادا.


المهم


راحوا عند بيت عيال عمهم وتقابلوا مع ابوهم يعني قلك يسون مفاوضات...


وهادا بدال هادا وما ادري ايش المهم مااتفقوا وقالوا خلينا نشوف الدب الداشر سالم ايش يقول؟.


وبعدين صاحبنا سالم كان سكران مع ولد عمو همام (ابو رحم) يعني رحيمو ... تعرفون كانو داشرين حقين شراب وبنات وكباين وشاليهات ومخلينها خل وطرشي


المهم ارسلو واحد يقول لهم الهرجة وجا الراجل الي بيقولهم الهرجة ، وكان الدب الداشر(الزير)


سكران مقربع مزبوط ومأجر السقف العلوي بالملحق كمان ... وطل همام وعرف الهرجة,


وفجأه طلع لهم الدب الداشر وقال:ايشبكم ياهووه ايش الهرجة قاعدين تتوشوشو علي ايش؟ ...


احس انو في شي بس ما تبغو تتكلمو ...بنت يا ضباع ايش الهرجة؟


المهم العالم خافت وقامت تنفض من الخوف... سحبو همام وقالو ادخل جو ونتفاهم ...


مسكو من صدرو قلّو ياهو ايش الهرجة قلبت راسي وفكفكتها معايه وانت عارف انو مرووقين وشاربين


قلّّو همام شوف: لو قتلوا اخوك كليب... ايش تسوي؟


قام ضحك الدب الداشر(الزير (الا شوي كشر بوجهو وقلب قارورة العرق وخلها تقطر شويه شويه...قلّو شايف هدا العرق كيف يقطر؟


طالع همام مستغرب


قلّو لا تستغرب ياواد ... لو قتلوا اخويه انا اخلي دم اخوي وكل قطره من دمو براس رجال من قبيلتهم


وانتا شوف اخوي قد ايش عندو دم( بكاش الواد هادا الزير) المهم.


همام قال:ياهوووووه ما بدها خليني اديلو الهرجة والي يصير يصير:


وقلّو الهرجة .... والدب الداشر(الزير) سوا مناحة ديك الليلة


وهاتك يابكى وصراخ زي البزوره ..تعرف مع السكار والخبر الي مزفت ..


نكب الدنيا ...المهم قاعد يقول اشعار وتهديد وتخاريف ومدري ايش من الكلام دا حق السكرانين..لمن طلع الصبح وصاحبنا نايم علي الدكة وحالتو حاله ...


ولد اختو من جد نذل قال لابوه:هيا نقتلو وهو سكران وفكنا من شرو


ابوه طرطع قلّو ايشبك انتا مجنون ؟ ياواد عيب دا خالك ... وسدحو بكلمتين وروق الواد.


المهم صبح الصبح وكل واحد يبغى يسري عند اهلو عشان يشوفون ايش الهرجة وكيف راح يدور البوكس بينهم( يعني المعركة ) وقبل مايمشون ...


سوا فلم هندي الدب الداشر وقرينو همام ...


قلك ماراح اقتلك وما ادري ايش وما ابغاك تكون خصمي يا همام ...


وقلك همام يقول لا ياهووووه كيف دولا أهلي وبرضو مااعتقد اني بسكت ... ومن الخرابيط هادي.


المهم كل واحد سرى عند اهلو...وقالوا بيننا البرحة ونشوف مين يغلب.


وباقي القصة يااولادي راح احكيكم هيه لما تنجحوا وتجيبوا الشهادة واقلكم ايش سوا ابو ليلى فيهم


شكرا لأبو محمد ناقل القصه ، وليتني كنت أعرف كاتبها لأذكر إسمه .

[سعودى العطاء]

:D:D:D:D:D:D:D

[علي بن علي]

وبعدين صاحبنا سالم كان سكران مع ولد عمو همام (ابو رحم) يعني رحيمو ... تعرفون كانو داشرين حقين شراب وبنات وكباين وشاليهات ومخلينها خل وطرشي

:D:D:D:D:D


تسلموا.

[ابو ثامر]

:D:D:D
ايش هدا يا ابو بندر ..خلو يحكي لبزارينه من التراس .

هادا اصله فاهم الفوله وكيلتها ..يربط بين الزي كان وما يحدس الان.

اصل حماته......

والا مراته.....

ياشيخ ابن الجيران في صغره اداله علقه محترمه .


ولك التحية.

[حادي العيس]

:D:D:D:D

اخو طليحه وبش هذا الكلام المبعكك....الله لايغير علانا ..اصبح الكلام مثل هروج المصاروه.

[باسم علي]

يا بويا إيش هاد روقنا يرحملى والديك ،،،،، ايش ابو بندر و الكلام هادا .

دحين اللي يسمعك يقلو عقل ابو بندر كان معاهم في ديك البرحه .

قلنا داك الداشر الدب سالم ومعاه الواد همام السمرقعي ،،،، اش دخلنى انا معاهم ،،، ولا تتبلى عليا يا ابو تامر ،،،، حيلك يابويه .

انت بس اصبر لمن اخلص القصة للبزوره ،،، بين وبينك البنت فتو مرت ولدى هتان محبكاها شويه ،، وراسها والف سيف الا تقضي الاجازه برى البلد ،،، و الواد ياعين امه منتف مامعاه تنتوفه حتى ،،، قام جالي بدو قرشين لزوم السفر ،،،، بسراحه ما اديتلوا وش ابدا .

لكن مرتوا فيها لؤم حبتين ،،،، البعيد عنك و السامعين،،،
البنت فتوا دي مصيبه ،،،، الله يصبها في كيعانها ،،،،
قامت راحت لأم هتان وبلفتها على اخوك مع كلمتين من الواد ،،،، وعينك ما تشوف إلا النور ،،، قلبت الحرمه عليه ميه وتمانين درجه .
وهاتك يانكد صبح وليل ،،، على بالها ام هتان مفكره إني رايح اسأل عليها ،،،، إش بنها بنت ارعطعشر علشان تتمغنج على اهلي ،،،، والله اديتها اشكل يا ابو تامر .

يوم يومين شافتني مطنش ومسوي عم زعلان عليها ،،، حتى شغل البيت اللي في العاده اسويه معاها ،،،،
مساعده بس مش اكتر ،،،، رميتبه ورا ظهري ،،،، ولا اجلي صحون ولا مسكت المكنسه حتى ،،،، علشان تعرف شغلها ،،،، وما انا هين ياحبيبي .

المهم هش افت يا خويا ابو تامر الموضوع قلب معاي بجد ،،،،
قامت بنت اللدين تحمر عيونها فيا ،،،
و اعرفها شرانيه بنت ستين في سبعين ،،،، هادي عشرت عمر .

قمت قلت ياواد اقصر الشر و ادي للولد فلوس خليه ينقلع هو و البنت فتوا ويريحونا من المشاكل وعور الراس اللي احنا في غنا عنهم .

الواد ما حسب بالقرنقش بيدو اخد البنت فتوا و اولاده وعلى او طياره ،،،،
راحوا هناك في بلاد الله يا خلق الله ،،،
وكل كم مين يوم يرسلى حولي قروش انا مقطوع ،،،
وامه هنا يلعن امه مافيه إلا ارسلوا ،،،
إش تبغى الولد يسوى هو وبزورته يسرق ولا يروح السفاره ويفضحنا ،،،
و ان حاولت افهمها إنو الولد بيستغفلها قامت قايمتها على راس اهلي ،،،
هلكتني ياشيخ .

وكله كوم ورحيمي اللي ما يستحي على وشه كوم تاني ، كل يومين ولا تلاته متشاكس مع البنيه ياعيني وجايتني بسياره اجره متنكده وخاطرها زي الزفت ،،،،
اقلو ليش ياواد ،،،
قليل الحيا يقلي بنتك ترسلني في انصاف الليالي تقلي تفسي بايسكريم ،،،،

اقلوا اش فيها دحين لمن تجيبلها ايسكريم مي مرتك .
يقلي ياعمى انا ساكن في جنوب جده ترسلنى شمال جده على الكرنيش تقلي تبغى الايسكريم من هناك حوالي خمس وعشرين كيلوا ،،،، كم مره رحت وجبته من هناكه ،،، يدوف في الطريق .

قلتله و إفرض انو يدوب ، حطه في الفريزر ،،، وبعدين اديلها هوا .

قام بيقلي ايه ،،،، انا قبل كدا لمن جبته وحبيت اعمل اللي قلتلي عليه ياعمي رمته في وشي وقالتلي يا غبي خذ ترمس احفضو بيه .

بصراحه انا ضحكت هي البنت قويه شوي طالعه لأمه الله يخليها وينقف امها ، بس انا ما ضحكت على قوت البنت لا ضحكت على هذا الغبي لمن طشت الايسكريم في وشه .

كان المفروض بيه انه يفكر صح وياخذ ترمس يحفض فيه الأيسكريم قبل ما يطش على وشه الكالح قليل الأدب .

كل هادا ياخوي ابو تامر انا ما يعنيني ،،، انا كل همى اللئيمه ام العيال ربنا يكسر رجولها وحده مصيبه قويه ،،، و إن تنكدت حطت حرتها فيه .

والله هى زي الواد الداشر الدب الزير سالم ،،، ما تسال في احد ،،، إلين ماجاله اليوم اللي سلط فيه ربنا عليه الرجال العجوز ابو عباد ، وقلعوا قلعه سدحوا فيها على الارض ،،، هي كدا رايح يكون مصيرها إذا ربك راد .

شوف انا مش خايف منها لا تفهمنى غلط ارجوك يا ابو تامر ، بس رفقا بالقوارير ، يعنى الواحد لازم يكون حنين معاهم حتى لو غلطوا .

معليه شكلي شطحت كثير عن الموضوع بس ابشر رايح اكمل الحكايه لمن يجي الواد و البنت فريال وبقية الاحفاد .

استأزنكم الله لايهينكم دحين .

[ابو ثامر]

"P"P"P"P

هاه اولاد ما جوا....الله يصرقعهم ..

هات اللي فيها واكمل الحكاية الجماعة دحين مقعمزين على التلفزيون يبغوا الحلقة التانية


روح اجري خلي صاحبنا يكمل ...مابقا الا اهل الهنداويه والشبيكه ..

صدقني اروح لغليل والا لشارع المنصور اجيب مناكه اكبر راوي واحط له مركاز العمده يحكي عليه العجب العجاب ولا يخاف من الداب يا واد يا كداب ياللي تدعي انه يجيب للبنت ايسكريم من ابحر ...فشخره هيه والا فشخرة .....انتوا يادوب ايسكريم البنقالي حف سوق الخيمة والا بياع البليلة الواد الافغاني ......قاعد هنياتي وتقول فلوس وايس كريم من شمال جده ومدري اش شكله ...ياراجل روح بس لحارة البخارية وجيب منها تميسه واحمد ربك.
:D:D

بس سرعه كمل الهرجة حقت الواد الدب الزير سالم سلمنا من شره.

[باسم علي]

يا ابو تامر .... انا محترمك لكبر سنك ياعجوز ،،،، لكن صدقني ما بدها .

دحين اندرلك ، و اوريك الليل في صباحية ربنا ..... انا حبيبي ما اعرف البكش ولا الكلك .

ياحرمه يام العيال ، قربيلي الشومه اللي سدحت فيها ميه ،،، ولا اقلك هذا العجوز المخرف ما يستحمل هزه منها ،،،، جبيلي الشومه اللي سدحت بيها تمنيه وتمانين ، والله احترت بأية شومه اندرله ،،،، خليها بالشومه ام اربع و اربعين ، افكفكله راسه اليوم هدا اللي اسمه او تامر .
اقلك يا ابو تامر قبيله لمن قابلتك ،،، ماقلتلي إنك إتمهرجت عليه هنا ولا كان وريتك شغلك ،،،، قسما بربي لكنت أمرخ إنت وولدك اللي معاك بزييت الزيتون اللي إنت خابروا ،،، لكن الله فككم من شر ما ينجر .

بسيطه اقابلك المره الجايه عند المركاز أياه ،،،، ومش رايح أجيب أي شومه ، إن ما أنفخ عليك نفخه تطيرك فو عامود النور يابعيد ،،،، عشان مره تانيه تبطل المهرجه و البهلله دي اللي إنت مسويلي فيها ابوا العريف .

و القصه مش رايح أكملها عند فيك حتى يجوا المسؤلين عن هادا المنتدى يترجوني و او شرطي ،،، يطرودك من هدا المكان .

بس اصير علي .

[علي بن علي]

اش هادا ..منك له وله ..خناقة شيوبه ..وشوم وكلام فاضي ..اش هااااادااا.

يالله بطلوا برطمه ...وكملوا الحكايه ياهوه.

الناس واقفه على رجل تتحرى اكمال الحكايه ...اش هاااداا

اما شيوبه حقون مركاز وشيشة واربعه اسود....اختشوا الولايا سهرانين وخايفين عليكم من هادا ايش اسمه...ايش اسمه ..الله يقطع شره ...مااانييي داري .

يالله بس كملوا الحكايه.:D

[باسم علي]

الجزء التاني من الزير سالم

فينكم يا اولاد والله وبالله العالم اشتقتلكم كثير ،،،، وخاصه الواد الخلبوص هادا ،،،

ماقلتلكم لاتطول في السفر ،،، ولا بس تحبوا تنكدوا على خاطر اهلي .... يالله انا جامعكم دحين علشان اكملك حكاية الزير سالم الداشر وكيف تغير بعد العربده و العربجه اللي كان فيها وواقع لشوشتو .

رجع الزير سالم على داك الرهوان اللي كأنه ( دباب صحراوي ياماها ) ( اه ياقلبي عليه ) رجع وهو على ظهر الخيل الله يصيبه برضه ماسك الزمزميه حقت الخمره ويقربع فيها ( والله مي زمزميه إلا قربه ) ، المهم مر من جنب ديك البركه حقت المويه .

كان مين فيها ديك الساعه ، كان الواد الخلبوص جساس قاعد بيتروش ويتسبح ، ورافع خشموا في السما ،،، ايو مو هو اللي قتل كليب ، وجاعص نفسه على هادا مين ياربي اللي يقولوا عليه جحدور ( ايه معناه مش عارف ) كان هادا اسمه ربيعه .

ربيعه شاف الزير سالم راح دعيس و الله وطي مات على نفسه ،،،، وممكن سواه الوسخ ،،، وقام يسرخ بعلو صوته علشان ينتبه الواد جساس ،،، الله يحرقوا خيب ظني طلع جبان ، خرج من البركه ، وعلى ملابسه حتى مالبسها ، و أداها ديك الفركه ، والله رجوله كانها عجلات ما تنشاف من السرعه .

وقع الواد ربيعه بيد الزير ، ساله الزير ؟

ياواد ياربيعه ، شوف إزا ما قلتلي الحق ، رايح احوس اهلك هنا ، و امردقك مردقه ، عمر اهل اهلك ما اكلوا زيها ؟

الواد ربيعه قد إنوا مستوي وخالص ،،، قله على طول داك الواد جساس اللي قتل اخوك وانا والله ما لي دخل في الهرجه كلها اللي سارت ،،،، الزير قله يالله انقلع من قدامي انا عارفه بس هو مو هدفى ،،،
إلا كل اهله رايح افصفصهم فصفه ( شوف البكاش كان مسطول ، مو شايف دربه ،،، وبعدين يقول يفصفصه هو قاعد في الملعب يتفرج مباراه بين الإتحاد و الأهلي و لا ايه ).
ما علينا منوا المهم هنا حلف إنوا ماعاد يشرب قطرة خمر وحده حتى ينتقم من اللي قتلوا اخوه ، و إنوا بسبب الخمره ماشاف اللي قتل اخوه قدام وشه ، ورمى زمزميته بوسط البركه ، حتى الخيول داك اليوم لمن شربت من البركه إنسطلت .

المهم في الموضوع كله هنا إن الزير رجع متأخر وكانوا الجماعه قبروا كليب ، بس قعد الزير يبكبك ، وهاتك يابكى وسط النسوان على قبر كليب ، يقولوا يازير التار ، يقول صبركم لمن انتهي من بنا قبر يليق بأخويا كليب ، خلص البنا يازير يقلهم صبركم ابكي كليب و اوفيه حقه من البكى .

فكروا العرب إن ما عندوا سالفه حتى إخوانه إتضايقوا كتير منوا ، وقالوا هدا فضحنا وبقي مسبه بين العرب كلهم عن بكرت ابيهم .

الواد جساس عنده واحد من أخوانه دنجوان ومسوي فيها حبيب ، وكان يحب مين مالت عليه وعلى أهله ، كان يحب البنت اخت الداشر الخمرقعي الزير ، المهم كان يواعدها ويشاغلها ، وكانوا اهله يستعدوا للرحيل من الحاره ، بعد ما فشلت سفارة أبن عباد .
إطلع اخوا الزير عن الهرجه و المرجه وعرف إن الصعلوك ربيعه هو المرسال بين الواد الدنجوان و اخته ، راح إستشار مين ، إستشار الزير ، وقلوا الهرجه كلها ، قله ياواد قوم جاي تقلي الكلام الناس تقتل عشان سبب اقل من هادا ، و إنت جاي تكلمني بالشرف ، إنقلع روح انحره نحرت بعرور .

ما صدق خبر الواد يبقى الحرب تقوم ، امال ايه ، تربص بالواد ربيعه ، وكفشه بجمب الخيمه ، قله شوف يواد ، يا اقتلك ياتوديني عند الدنجوان اللي راسلك شغل الزنونه هادا ما يمشي عليه ، والله اخده الواد ربيعه الندل ، ودله على مكان الواد السربوت الغزلجي ، وبس وماكان من اخوا كليب إلا يشحطه بالسيف إلا وهو ميت من زمان .
بعدين رجع للواد ربيعه ، قله اسمع ياواد ،،،، قلي جساس فين و لا اكمل فيك دحين و اخليك التاني ،،،، خرطله السبحه على طول ،،، اقلكم دا ربيعه ندل ماله صاحب ،،،، بعد ما قله الحكايه ،،،، قال اخو الزير يالله ياواد شيل الجته ،،، و انقلع من قدامي دحين .

وصل الخبر لحارة الزير وهمام .... و إنقلبت الحاله .... هناك فرح الحرب رايحه تقوم وهناك حزن على مقتل الدنجوان .

فيه واحد ياحبايبي الحلوين ،،، من اولاد همام سكرجي عربيد ،،،، إنضم لخالوه الزير ( مو منوا من الخمره و البلاوي اللي شافها عند الداشر سالم ) ،،، يبقى يحارب اهله طبعا مع الزير ،،،، كان جالس يقربع خمره في الكرخانه اللي بين الحارتين ،،،، جالوه خبر رحيل اهله من الحاره لحاره تانيه ،،، وخبر مقتل عمه دنجوان الغبره .

ما صدق ومع السكره قام يبربر و إنوا رايح هو اللي يشعل الحرب ،،، راح الحاره حصل اهلمه شردوا قام يقول طز ياهمام ،،، طز يازير ،،، كلكم خوافين حريم مش رجال ، وهاتك يابكش وهرج فاضي .
راح لواد وكأن قدره سايقوه لفين لخالوا الزير عند قبر كليب ،،، والزير روحه طالعه وواصل معاه لأطراف خشومه ،،،، وكانت معاه البنت الحقودي بنت كليب تبلف فيه ، وهو زي النفيخه يتعبى على طول .
قام الواد وهو مسطول يسب الزير خاله ،،، المهم كان الزير مديلوا سيف من عندوا هديه ،،، قام الأهبل الواد سحب السيف ورماه على قبر كليب وقال لخالوه العربجي الزير ، خد سيفك هذا ما يصلحلي عشان انا راجل ،،،، افضل انضم لعمي جساس مو لك إنت ،،،، سيفك دا إتقلدوا قدام الحريم احسن لك .

صرخ العربجي الزير بعصبيه ،،،، وشال السيف ورماه على الواد وهو مقفي ،،،، كان يضرب السيف في ظهره ويخرج قبل من صدره ،،، صرخت اليمامه بنت كليب وجرى على الحاره تبلغ إن الزير قطع خبر الواد ،،، الزير كان يحبوا ما يكره لكن ،،، العربجيه حقتوا جابت اجل الواد ،،، وقام يبكي الزير من جديد ،،، ويتوعد إن رايح يضم تاار الواد لتار كليب وينتقم من الصعلوك جساس .

حقيقه حقيه الخبر هدا ازعج الفريقين ، وخاصه ضباع اخت الزير اللي جات تهدد الزير و الزير يقلها و الله يا اختي العزيزه قتلته بالخطاء وما كنت اقصد وبعدين هو معاي ليه اقتله ،،،، لكن بدك تقتليني بداله أنا جاهز ، شيلي السيف و اغرزيه في صدر والله انا راضي ،،،، المهم مشيت من عنده وهي تولول وتقله لا تقتل احد من اولادي تاني .

في هدي اللحضه وصل اخو الزير لجساس المندس من الخوف ، وطب عليه على غفله ،،،، وقله جيتك ابقى اقطع خبرك ،،، ياغدار ،،، قام الواد جساس ضحك قله وانا ريح ارسلك ورى اخوك كليب ،،، علشان تسلم لي عليه وتقله كيف حصلت جساس ،،،، سحب السيف حقه جساس ،،، وقامت العركه بينهم لكن طلع الواد اخوا الزير لا زير ولا كليب ،،،، دقايق ما وقفها وخلص عليه جساس .

اقلكم حكايه كلها نكد في نكد ،،،، وكلها مناقره وهواش ،،،، وبكى وصريخ .

المهم بداء الجد و الزير لبس عدة الحرب ،،،، وجا مع الزير ذاك الواد المرجوج اللي يوديه الزير ويجيبه ، امرئ القيس إبن آبان ، وتجمعوا وجمعوا الفرسان ،،،، وقوم ياواد ياكور يا ياقوت دق الرجووج .

و إندق الرجووج ،،،، اعرف إنتم ياولاد ما تعرفوا إيش هو الرجووج ،،،، لكن هو طبله كبيره معلقه بثلاث خشبات زي المرجيحه تمام يدق عليه واحد من العبيد وقت الخطر ولا الحرب ينسمع في أكثر من حاره ،،،، صوتوا زي مدفع رمضان .

وهيا قوموا هلحين إتوكلوا على الله ياحبايب ،،،، وبعد يومين اكملكم الحكايه .

يعني الجزء التالت .

[مفرح]

شش يا قوم هذا كلام عربي والا كلام بنقالي ....عندي بتقالي في المنحل يخربط مثل هذا الكلام...وام تهامي لا يعرف ماذا يقول ....اللــــــــــه يستر عليكم ترجموا لي خلوني افهم .:D

[علي بن علي]

يا ويحك يا باسم علي ...موضوعك هذا سرقته وحده وحطته في القمة ..وتقول جاها على الجوال.....

خلص هات البقيه قبل لا يشوهوا عليك القصة .

اصيحت قصتك رواية عالمية بتمثلها بكره ..جيانا عيد وعبد الرحمن الرشي :D
مسلسل بدوي باللهجة الحجازية (6)

[باسم علي]

جائني كليب في المنام ينادي ***** قم ياباسم واكمل قصة الثار
ثمل الزير وفي الحانة يصيح **** قم ياباسم للثأر واشعل النار
الزير خلـف الـغواني لاهـيا **** نسي دم كليب وباسم الجسور
غـدا يخــور الـزير نـادمـا **** واسم باسماعلى الجسورمحفور
جائني كليب في المنام ينادي **** لبيك كليبا لثأرك ودمك اثور
وساقتل الداشر سالم بنسعك **** وجساس قاتله بشومة ومسمار

[ابو ثامر]

جائني كليب في المنام ينادي ***** قم ياباسم واكمل قصة الثار


.....

يا الله قوم واسمع كلامه لايجيك تاني ..ياهوه انت مش حمل كليب.:D

[باسم علي]

نخليها هدية العيد يا ابو ثامر:D

[باسم علي]

كاتب الرسالة الأصلية باسم علي
جائني كليب في المنام ينادي ***** قم ياباسم واكمل قصة الثار
ثمل الزير وفي الحانة يصيح **** قم ياباسم للثأر واشعل النار
الزير خلـف الـغواني لاهـيا **** نسي دم كليب وباسم الجسور
غـدا يخــور الـزير نـادمـا **** واسم باسماعلى الجسورمحفور
جائني كليب في المنام ينادي **** لبيك كليبا لثأرك ودمك اثور
وساقتل الداشر سالم بنسعك **** وجساس قاتله بشومة ومسمار


هل نكمل يا ابو ثامر بقية القصه ام ننتظر قليلا ؟؟؟؟