قصيدة للشاعر ضيف الله الميزاني لما رائه من شباب هذا الزمان

[سطام بن فهيد]

هذه قصيدة للشاعر ضيف الله ابن مصاول ابن مدلج الميزاني المطيري
المتوفي عام 1999م

لما رائه من عادات سيئه لشباب هذا الزمان



وجدي على اللي شوفهم يشرح البال = كرام النفوس أهل العقول الثقيله

كرام النفوس اللي يربون الأجيال = على المكارم والقيم والنفيله

نطاحة الواجب شريفين الأفعال = افعالهم من كل جانب جميله

اللي لهم في نجد شهره ومدهال = الأسم فاخر والفعائل جزيله

صار العوض فيهم لنا بعض الأشكال = جيلٍ طلع تالي جديدٍ مديله

جيلٍ اليا شاهد له الميل ميال = ومن وين ماجات العواصف تشيله

من طلعته ماهو للثقل شيال = ولا ينطح الكايد ولا يرتكيله

دايم سواليفه بيجر وجوال = وسوالف الماضين ما تستويله

جنب طريق الأبو والجد والخال = وضيع سراه الله يضيع دليله

ليا شاف لعاب الورق جاه بالحال = ولعب معه والتتن مالٍه يشيله

وان فازوا أهل المنتخب صابه أهبال = وطاح وزميله قال واعزتيله

كنه صويب الحرب مع ربعن أبطال = تطلب له الأسعاف حتى تشيله

ساعة وقع قالوا ترى طاح رجال = ما يعلمون أنه دبشتن هزيله

هزيل عقل ومخ وأفكار وأفعال = واللي مثل هذا حياته فشيله

طبايعٍ ما جابها العم والخال = جتنا من أصحاب الطباع الرذيله

حنا طبايعنا الكرم والتهلال = اليا نصونا اهل السلوم الأصيله

وحنا العرب يضرب على فعلنا أمثال = بشجاعةٍ فالحرب ماهي قليله

يعيال أهالي نجد وش غير الحال = عودوا الى التاريخ وخذوا دليله

المرجله ماهي بأغاني وموال = ولا شريط افلام ورد بحيله

شوموا عن أصحاب الحيل والتحيال = وأبنوا لدرب العز صفحه جميله

والحر ما يصلح مع البوم نزال = يشهر ويلقاله أحرارٍ تجي له

عيب وحرام وعشرة المحروم غربال = واللي محرم مايجوز تحليله

يابن الحموله ليش تنزل من العال = وتتبع دجاجٍ منعثر في مقيله

لاتنزل أنهض فوق عن كل دجال = مالك ومال أهل العقول العليله

يا وقت يا وقت العجايب والأهوال = ياللي وصلنا بك طبايع دخيله

وصلوا على المختار والصحب والآل = عداد من شاف القمر من قبيله



الشاعر/ ضيف الله ابن مصاول ابن مدلج الميزاني

[البدوي الملثم]

شكرا أخي سطام وهو ماقال غير الحقيقة الله يصلح الحال

[ابو ثامر]

هزيل عقل ومخ وأفكار وأفعال = واللي مثل هذا حياته فشيله

.....

تسلم يا ابن فهيد....اختيار موفق.

[سطام بن فهيد]

مشكورين على مروركم

مشكورين على ردودكم الرائعه


ومن قال يسلم


لكم احلى تحياتي









اخوكم


سطام